DC SHAKA ALITAKA JESHI LA POLISI KUWACHUKULIA HATUA WALIOUZA ARDHI YA KIJIJI

Posted on: May 5th, 2024

Mkuu wa Wilaya ya Kilosa Mhe. Shaka Hamdu Shaka ameagiza Jeshi la Polisi Wilayani Kilosa kukamatwa kwa mwenyekiti wa kitongoji cha Msowero A,  Bw. Peter Sanga pamoja na mwananchi mmoja  Bw. Awadhi Aweso kwa tuhuma za kuuza ardhi ya Serikali eneo la Mlima wa Kijiji lenye zaidi ya Ekari 100 kwa kiasi cha shilingi milioni 12 kinyume na utaratibu.

Mhe. Shaka ametoa maagizo  hayo Mei 4,2024 wakati wa mkutano wa hadhara wa kusikiliza kero na changamoto za wananchi katika Kata ya Msowero Wilayani humo.

Kufuatia changamoto hiyo Mhe. Shaka amewataka wananchi  wengine waliohusika katika kuuza na kununua eneo hilo la Kijiji kujisalimisha kwa Jeshi la Polisi kabla ya serikali kuwasaka popote pale walipo.

Kwa Upande wake Mwenyekiti wa Kijiji cha Msowero A, Bw.Sanga amekiri kupokea kiasi cha shilingi laki 5 kuwezesha kuuzwa kwa eneo hilo la Mlima wa kijiji.

Kuhusu changamoto zingine zilizotolewa na wananchi kama vile ubakaji na udhalilishaji wa wanawake, Mhe. Shaka amekemea vikali vitendo hivyo huku  akivitaka  vyombo vya ulinzi na usalama kuchukua hatua kwa yeyote atakayeendelea kufanya vitendo hivyo viovu vinavyopelekea uvunjifu wa amani kwa wananchi.