DC SHAKA AWATAKA VIONGOZI WA VIJIJI KUCHUKUA HATUA DHIDI YA VITENDO VYA UVUNJIFU WA AMANI KIDUHI

Posted on: June 19th, 2025

Mkuu wa Wilaya ya Kilosa Mhe. Shaka Hamdu Shaka amewataka wananchi kuishi kwa amani, upendo na kuheshimiana ili  kuepuka migogoro isiyo na tija.

Mhe. Shaka ameeleza hayo Juni 16, 2025 katika mkutano wa hadhara uliofanyika kata ya Kilangali kijiji cha kiduhi ambapo wananchi wa kijiji hicho waliwasilisha kero mbalimbali ikiwemo migogoro ya wakulima na wafugaji.

Akiwa katika mkutano huo Mkuu uyo wa wilaya amewataka wafugaji na wakulima wa kijiji hicho kuacha migogoro isiyokuwa na tija badala yake wajikite kwenye shughuli za uzalishaji mali ili kujiinua kiuchumi.

Sambamba na hayo Mhe. Shaka amesema serikali ya Kilosa imeshafanya maamuzi ya kurudisha kamati za amani zilizokuwepo kipindi cha awali zinazojumuisha wakulima, wafugaji na watu mashuhuli ziendelee kufanya kazi ili  zisaidie kupunguza migogoro hiyo na jamii iweze kuishi kwa amani, upendo  na ushirikiano.

Aidha Mhe. Shaka amewatoa hofu wananchi hao na kuwaahidi changamoto zote walizowasilisha amezipokea kwa ajili ya kuzifanyia kazi na kuzitafutia ufumbuzi  hivyo waendelee na shughuli zao za kila siku kama kawaida.