VIONGOZI WA DINI NA CHAMA WAHAMASISHA ZOEZI LA UCHANJAJI UVIKO-19

Posted on: January 23rd, 2022

Serikali Wilaya ya Kilosa mkoa Morogoro kwa kushirikiana na Viongozi wa Dini na Chama Cha Mapinduzi (CCM)  wameanza upya zoezi la kutoa elimu kuhusu faida za Chanjo ya UVICO 19 baada ya takwimu za hali uchanjaji kutoridhisha.

Akieleza hali ya uchanjaji hadi sasa Mganga Mkuu Wilaya ya Kilosa Dokta George Kasibante amesema Wilaya hiyo ina zaidi ya wakazi laki tano (500,000) huku matarajio kuchanja watu laki tatu na elfu ishirini  (320,000 ) ambapo hadi sasa waliochanja ni watu elfu ishirini na nne tu (24,911) jambo ambalo haliridhishi.

Dkt. Kasibante amesema mpango wa Serikali ni kufikia asilimia sitini kwa watu waliochanja hivyo wameona ni vyema kushirikisha viongozi wa dini ,na viongozi wa Chama Cha Mapinduzi ambao wanaushawishi mkubwa katikati ya jamii.

Kwa niaba ya viongozi wa dini Alhaji Nassoro Milambo ametoa rai kwa wananchi kujitokeza kwa wingi kupata elimu na chanjo  ili kuwa  na afya njema huku akitolea mifano baadhi ya nchi ikiwemo Saudi Arabia ambayo hairuhusu waumini wa dini ya kiislam kuingia katika nchi hiyo ili kutekeleza ibada ya hijja  kutokana na hofu ya ugonjwa wa corona ambao umesababisha vifo vingi, sambamba na hayo amesisitiza wanachi kushiriki zoezi la sensa pindi litakapoanza ifikapo mwezi wa nane mwaka huu.

Naye katibu wa Chama Cha Mapinduzi Wilaya ya Kilosa Shabani Mdoe anasema kitendo Cha Rais Samia Suluhu Hassan kuruhusu chanjo ametimiza ilani ya uchaguzi ya Chama hicho kwani imeelekeza Serikali kujali afya za wananchi huku Mkuu wa Wilaya Alhaj Majid Mwanga akisisitiza suala la wananchi kujiandaa na Sensa ya watu na makazi inayotarajia kufanyika mwezi AgostI 2022 na kwamba hiyo itakuwa dira ya Serikali kutenga bajeti kubwa katika sekta ya Afya kulingana na uhitaji