WAHE. MADIWANI WAISHUKURU SERIKALI YA AWAMU YA SITA KWA UTEKELEZAJI WA MIRADI YA MAENDELEO

Posted on: May 30th, 2025

 Wahe. Madiwani Wameishukuru Serikali ya awamu ya sita inayoongozwa na Dkt.Samia Suluhu Hassani Rais wa Jamhuri ya Muungano wa Tanzania kwa kuleta fedha nyingi kwa ajili ya  utekelezaji wa miradi ya maendeleo katika Halmashauri ya wilaya ya Kilosa.

Hayo yamezungumzwa na Makamu Mwenyekiti wa Halmashauri ya Wilaya ya Kilosa  Mhe. Hassan Mkopi  wakati wa Mkutano wa Baraza la wahe. Madiwani kwa kipindi cha robo ya Tatu kwa mwaka wa fedha 2024/2025 ambalo pia ni baraza la mwisho lililofanyika Mei 30, 2025 katika ukumbi wa  FDC- Ilonga huku akisifu usimamizi mzuri wa Timu ya menejimenti.

Mhe. Mkopi ameongeza kuwa katika awamu ya sita Halmashauri ya Wilaya ya Kilosa imepokea fedha nyingi kutoka serikali kuu kwa ajili ya utekelezaji wa Miradi mbalimbali ya maendeleo hususani katika sekta ya Afya na Elimu.

Kwa upande mwingine  akijibu swali lililouzwa na Mhe. Livinus Mhawila Diwani wa kata ya Mikumi kuwa ni mikakati gani inafanyika katika kutatua changamoto ya uvamizi wa tembo mashambani, Mhe. Mkopi amesema Halmashauri hiyo imejipanga madhubuti katika kutatua  changamoto ya uvamizi wa tembo katika makazi na mashamba ya wananchi katika kata za Mikumi, Mhenda, Kidodi, Kilangali na Kimamba na kuhatarisha usalama wao ambapo  mpaka sasa juhudi za kununua risasi kwa ajili ya kuwaondoa wanyama pori hao zinafanyika kwa kushirikiana na Taasisi ya TANAPA pamoja na TAWA.