WANUFAIKA WA TASAF KATA YA MAGOMENI WAELEZA JINSI WALIVYOONDOKANA NA UMASKINI

Posted on: January 27th, 2025

Wananchi wa Kata ya Magomeni Wilayani Kilosa  wameelezea Mafanikio waliyoyapata kupitia Mradi  wa mfuko wa  maendeleo ya Jamii wa Kunusuru Kaya Maskini (TASAF)ambapo wamebainisha kuwa mfuko huo umewatoa  kutoka katika hali duni mpaka kufikia hali ya Wastani ambapo kwa sasa wanaweza kupata mahitaji muhimu ikiwemo Chakula,Mavazi na Malazi

 Hayo yameelezwa Januari 27,2025 wakati wa Ziara ya Viongozi wa Tasaf kutoka Makao Makuu wakiongozwa na  Mkurugenzi wa TASAF Nchini  Bw. Steven wakati wa Ziara ya kukagua Miradi ya TASAF inayotekelezwa Wilayani Kilosa.

Wakielezea mafanikio hayo baadhi ya Wanufaika wa TASAF kutoka Kata ya Magomeni akiwemo Bi Dorothea Mbombwe amesema kuwa baada ya kubahatika kuwa mnufaika wa mradi huo fedha alizozipata zimemsaidia katika masomo na kuweza kuhitimu Elimu ya Stashahada ya Maendeleo ya jamii ambapo ameiomba Serikali kuendelea kusaidia Kaya zinazokidhi Vigezo ili ziweze kuondokana na Umaskini.

Kwa upande wake Bi Lilian Samwel kutoka Kata ya Magomeni ameishukuru Serikali kwa kuanzisha Mradi huo wa TASAF Kwani amesema  mfuko huo umemsaidia kununua Cherehani kinachomsaidia kujipatia kipato kwaajili ya kuendesha familia yake kila siku.

Naye Mkurugenzi  wa TASAF Bw John Steven amesema mfuko huo wa TASAF imeweza  kufanikisha miradi mingi ndani ya Mkoa wa Morogoro yenye thamani ya shilingi Bilioni 66,pia amesema wamefanikiwa kutoa ajira za muda ambapo zimetumia kiasi cha shilingi Bilioni 23 na kutekeleza miradi 1500 Mkoani Morogoro.

 Aidha ameyataja mafanikio mengine kuwa ni pamoja na  kuwafikia Walengwa 43000 ambapo kati yao21000 wamehitimu katika Mpango wa TASAF na kuunda vikundi zaidi ya 3000 vikiwa na wanachama zaidi 36000 ambapo vimeweza kupatiwa  kiasi cha shilingi milioni 522 kwaajili ya utekelezaji.