WATAALAMU WA AFYA WAMETAKIWA KUTEKELEZA MIKAKATI YA KUBORESHA HUDUMA YA MAMA NA MTOTO

Posted on: January 29th, 2025

Wataalamu na wadau wa Sekta ya Afya hususan ya mama na mtoto Mkoani Morogoro wametakiwa kutekeleza  malengo  na mikakati madhubuti waliojiwekea ya kupunguza na hatimaye  kutokomeza  vifo vitokanavyo na Uzazi pamoja na vya watoto wachanga

Kauli hiyo imetolewa na Mkuu wa Wilaya ya Kilosa Mhe. Shaka Hamdu Shaka 28 Januari, 2025 wakati wa ufunguzi wa kikao cha kujadili vifo vitokanavyo na uzazi pamoja na watoto wachanga ngazi ya Mkoa kwa kipindi cha robo ya pili kilichofanyika katika ukumbi wa MT.Wilayani Kilosa.

Mhe. Shaka ambaye alikuwa Mgeni rasmi  amesema kuwa kupitia kikao hicho anatarajia kuwepo na mabadiliko kwenye huduma ya afya ya mama na mtoto ili kufikia malengo ya Kimkoa.

“Natambua na kuthamini sana Juhudi zenu katika kupunguza vifo hivi lakini niombe kikao hiki kiwe na matokeo na mikakati mipya ili kufikia malengo ya Kimkoa, Kiwilaya na Kitaifa ili kutokomeza kabisa  vifo vitokanavyo na uzazi pamoja na watoto wachanga.” Alisema Mhe. Shaka

Mhe. Shaka ameeleza kuwa kwa kipindi cha miaka mitatu takwimu zinaonesha bado jitihada zinahitajika katika vituo vya kutolea huduma za afya ili kuhakikisha wanapunguza kabisa vifo vitokanavyo na uzazi na vifo vya watoto wachanga .

 “Kuna kazi ya kujenga na kuaminisha wananchi wetu kwamba huduma zetu ni rafiki na huduma zetu ni salama.” Alisema Mhe. Shaka

Aidha Mhe. Shaka ameishukuru Serikali ya awamu ya sita inayoongozwa na Dkt. Samia Suluhu Hassan  kwa kuboresha na kuweka mazingira mazuri katika kutoa huduma za afya ya mama na mtoto sambamba na kuongeza idadi ya watumishi katika sekta ya Afya, kuboresha huduma katika vituo vya afya kwa kutoa dawa na vifaa tiba.

Kwa Upande wake Mganga Mkuu wa Mkoa Dkt. Best Magoma amesema suala la afya ya uzazi na mtoto ni ajenda ya Kitaifa yenye maslahi ya nchi  hivyo kikao hicho ni cha kitaalamu  chenye  lengo ni kupeana ujuzi,  mbinu na kusaidiana kunapokuwa na mapungufu  ili yaweze kurekebishwa.