RC CHALAMILA AWATAKA WAKULIMA KUFANYA KILIMO CHENYE TIJA

Posted on: July 20th, 2024

Mkuu wa Mkoa wa Dar es Salaam Albert Chalamila  amewataka wakulima kuzalisha mazao yenye viwango ili yaweze kuingia kwenye soko la ushindani wa kibiashara la kitaifa na kimataifa na kupelekea kuinua uchumi wa mkulima mmoja mmoja.

Hayo yamesemwa Julai 19, 2024 katika kikao cha kamati kuu ya maandalizi ya Nanenane kilichofanyika katika ukumbi wa Jeshi la Kujenga Taifa (J.K.T) nanenane ambapo Mhe. Chalamila amesema maonesho ya nanenane ya mwaka huu kutakuwa na mazao yatakayoweza kuingia kwenye ushindani wenye tija.

 Pia Mhe.Chalamila  ambaye pia ni Mwenyekiti wa kamati kuu ya maandalizi ya nanenane amewataka wakulima, wafugaji na wavuvi kujitokeza kwa wingi kushiriki maonesho hayo ambayo ni fursa kwao kujifunza na kujionea  teknolojia mbalimbali za kilimo.

“waje kwa wingi ili waweze kuona vipando,mazao, mifugo na kuona teknolojia nyingine nyingi za kilimo ambazo  leo tupo kwenye kilimo kinacholenga zaidi kudhibiti kasi ya mabadiliko ya tabia nchi.” amesema Mhe. Chalamila.

Aidha Mhe. Chalamila ameishukuru serikali ya awamu ya sita inayoongozwa na Rais wa Jamhuri ya Muungano wa Tanzania Mhe.dkt. Samia Suluhu Hassani kwa kuendelea kutenga fedha kwa ajili ya kuboresha sekta ya kilimo kutoka kilimo siasa kwenda kwenye kilimo uchumi.