ELIMU YA UTAMBUZI WA FEDHA HALALI YATOLEWA KILOSA

Posted on: May 31st, 2019

Mei 31 mwaka huu Watumishi wa Umma wa Halmashauri ya Wilaya ya Kilosa pamoja na wafanyabiashara wilayani Kilosa wamepewa elimu ya utambuzi wa noti halali ikiwa ni tahadhari ya uwepo wa noti bandia zilizoko mitaani ambazo hazina thamani yoyote.

Elimu hiyo imetolea na Afisa wa Benki Kuu ya Tanzania (BOT) kutoka mkoani  Dodoma  Lilian Silaa ambapo amesema kuwa ni vema jamii ikafahamu kuwa kughushi ama kumiki fedha bandia kwa nia ya kuzitumia ni kosa la jinai ambapo yoyote atakayebainika atashtakiwa kwenye vyombo vya kisheria na endapo mtu akishuku uwepo wa noti bandia ni vema akaipeleka benki ama kituo cha polisi kwa uthibitisho.

Akieleza hatua za kutambua noti halalai amesema ni vema ukaichunguza fedha husika kwa umakini, fedha hiyo inapopapaswa ni lazima uhisi mparuzo kwenye maneno yaliyoandikwa kwa maandishi maalum, fedha hiyo pia itambulike  kwa kuangalia sura ya Mwalimu Julius Kambarage Nyerere inayoonekana unapoimulika noti kwenye mwanga pamoja na kutumia taa maalum yenye mwanga wa zambarau kuhakiki alama maalum zilizoonyeshwa kwenye vipeperushi na matangazo yanayohusu elimu ya fedha halali.

Aidha ameongeza kusema ni vema mwananchi au mtumiaji wa fedha akakagua utepe maalum  kwenye noti ya shilingi 500/=, 2000/=, 5,000/= na 10,000/= unaoonekana kama madirisha yenye umbo la almasi ambao hubadilika badilika noti inapogeuzwa ambapo noti ya 1,000/= utepe wake ni tofauti.

Akihitimisha elimu hiyo Silaa ametoa wito kwa wananchi  wenye noti zilizokatika kuzipeleka benki ambapo zitapokelewa na kwamba pesa zinazopokelewa ni zile zilizokatika na kutozidi vipande vinne huku akisisitiza watu kutouza fedha hizo kwa wajanja ambao huzinunua kwa kiwango pungufu ambapo wakishanunua huzipeleka benki na kupata fedha iliyokamilika na kupata faida huku muuzaji akipata hasara.