ijue reli ya kisasa kwa kiwango cha kimataifa

Posted on: April 27th, 2018

Serikali ya Awamu ya Tano katika kuhakikisha inawaletea wananchi maendeleo kupitia Shirika la Reli Tanzania (TRC)  imekusudia kujenga reli ya kisasa kwa kiwango cha kimataifa hapa nchini ikiwa na upana wa mita 1435 reli ambayo inapatikana duniani kote kwa zaidi ya asilimia hamsini na tano.

Akielelzea kuhusu reli hiyo Mhandisi wa mradi wa ujenzi wa reli ya kisasa kwa kiwango cha kimataifa Ismail A.Ismail amesema reli hiyo itakuwa ikipitisha treni zitakazoendeshwa kwa nguvu ya umeme na itakuwa na mwendo kasi usiopungua kilomita 160 kwa saa huku lengo la reli hiyo likiwa ni kuongeza ufanisi katika sekta ya usafirishaji nchini hususan katika sekta ya reli.

’’Miongoni mwa mambo yatakayorahisishwa kutokana na uwepo wa reli hiyo ni ongezeko la usafirishaji mizigo ambapo reli itabeba mzigo mpaka wa tani 10,000 kwa mkupuo sawa na uwezo wa malori 500 ya mizigo, uokoaji wa muda kusafiri kwa abiria na mizigo, uboreshaji huduma za kijamii ikihusisha ujenzi wa shule, vituo vya afya na ujenzi wa barabara katika maeneo yatakayopitiwa na mradi pamoja na kuchochea maendeleo katika sekta ya kilimo, biashara, madini na viwanda’’. Ameongeza mhandisi

Aidha Ismail amesema ujenzi wa reli hiyo upo katika awamu tano ,awamu ya kwanza ni Dar es salam - Morogoro, ya pili Morogoro - Makutupora, awamu ya tatu Makutupora - Tabora, awamu ya nne Tabora - Isaka, awamu ya tano Isaka - Mwanza, ambapo awamu ya kwanza ilizinduliwa na Rais wa Jamhuri ya Muungano wa Tanzania Dkt. John Pombe Magufuli  Aprili 12 2017 na awamu ya pili  Machi 14 2018.

Naye Mkuu wa Wilaya ya Kilosa Adam Mgoyi ametoa rai kwa  wananchi kutumia vizuri fursa ya uwepo wa mradi huo kwa kuchangamkia fusra za ajira  na kibiashara zitakazojitokeza, kuchukua tahadhari ya magonjwa  na kuwa wazalendo kwa kulinda mali zote za mradi ili kuhakikisha serikali ya awamu ya tano inatekeleza vema jukumu la kutuletea maendeleo.