KERO YA MAJI NA ARDHI KUPATA SULUHU

Posted on: August 28th, 2021

Mkuu wa Wilaya ya Kilosa Mhe Majid Hemed Mwanga Agosti 27 mwaka huu  kwenye mkutano wa hadhara wa kijiji cha Ilonga amejibu kero zanazowakabili wananchi ikiwemo maji na ardhi ambapo amesema kuwa Serikali ina mipango mizuri ya kuwaletea huduma ya maji waliyoikosa kwa muda mrefu kwani tayari milioni 40 zimeshatengwa kwa ajili ya kukamilisha mradi wa maji ya bomba kijijini hapo.

Mh. Mwanga amemtaka Injinia wa Maji Kilosa kuhakikisha  pindi mradi wa ujenzi wa kituo cha afya unaoendelea kujengwa ukikamilika pia mradi wa maji uwe umekamilika ili kuondokana na adha ya utumiaji maji yasiyo salama, huku upande wa mgogoro wa ardhi ambao upo kwa muda mrefu amewataka wananchi kuwa na subira kwani suala hilo linafanyiwa kazi ili kuhakikisha wakulima wanapata ardhi kwa ajili ya kuendeleza kilimo.

Katika hatua nyingine amesema kuwa tayari Kamishna wa Ardhi amemuhakikishia kwamba wataalamu watafika Septemba Mosi mwaka huu ili kufanya urasimishaji wa ardhi wa hekari 1400 ambazo zipo katika mgogoro ili kubaini tatizo na kulifanyia kazi.