KUSANYENI MAPATO - DC KILOSA

Posted on: June 1st, 2018

Mkuu wa Wilaya ya Kilosa Adam Mgoyi ametoa wito kwa Halmashauri ya Wilaya ya Kilosa kuweka mkakakati madhubuti ili kuhakikisha mapato yote ya serikali yanapatikana hasa katika kipindi hiki cha ukusanyaji mapato ili kufikia lengo la kukusanya shilingi bilioni 3.3

Mgoyi amesema hayo wakati alipokuwa akitoa nasaha katika kikao cha baraza la madiwani wilayani Kilosa na kusema kuwa kamati ya ulinzi na usalama wilaya  ipo tayari kusaidia katika kutimiza mkakati huo lengo ikiwa ni kuhakikisha kila kitu kinakwenda sawa katika kufanikisha ukusanyaji wa mapato.

Mgoyi amesema mapato kwa sasa yapo chini sana hivyo ipo haja ya kujitathmini upya  kwani fedha zinatakiwa kukusanywa toka kwa wananchi na kwamba kamati ya fedha isimamie zoezi zima la ukusanyaji mapato na kuhakikisha kila mmoja anahusika kwani msimu huu ni msimu wa mavuno na kwa asilimia kubwa Kilosa inategemea kukusanya mapato yake kupitia kilimo

Aidha Mwenyekiti wa Halmashauri ya Wilaya ya Kilosa Hassan Mkopi ambaye ni diwani wa kata ya Mvumi amewaagiza watendaji wa kata zote kusimamia  mawakala  lengo ikiwa ni kuhakikisha yanapatikana mapato stahiki kulingana na kinachopatikana na kwamba mtendaji atakayeshindwa  kufanya hivyo hatua za kisheria zitachukua mkondo wake.