MAAFISA UGANI NA MAENDELEO YA JAMII WILAYANI KILOSA WAPATIWA MAFUNZO YA FURSA NA VIKWAZO (O&OD) KWA VITENDO

Posted on: October 3rd, 2024

Maafisa Ugani na Maendeleo ya Jamii ngazi ya Kata Wilayani Kilosa wamepatiwa Mafunzo  ya mfumo wa Fursa na vikwazo kwa vitendo lengo likiwa ni kuwawezesha kuhamasisha Wananchi  kuibua Miradi ya Maendeleo kulingana na Mahitaji yao pasipo kutegemea Serikali kuu.

Akizungumza wakati wa  Mafunzo hayo Oktoba 3,2024 Mratibu wa O &OD Mkoa wa Morogoro Ndg.Gibson Mwakoba amesema kuwa mafunzo hayo ya siku 2 yanatolewa kwa ushirikiano wa Ofisi ya Mkuu wa Mkoa Morogoro, Chuo cha Serikali za Mitaa Hombolo na Wizara ya Tamisemi kwa udhamini  Shirika la Jica na PS3+.

Mwakoba amesema kuwa mafunzo hayo yanatolewa kwa awamu ya pili ndani ya Wilaya ya Kilosa ambapo awali mwaka 2023, mwezi Novemba yalitolewa kwa nadharia  na awamu hii yametolewa kwa vitendo lengo likiwa ni kuwajengea uwezo Wakufunzi hao ngazi ya kata kutumia mfumo huo wa ujifunzaji.

Kwa upande wake Mkurugenzi wa Utawala Bora na ushirikishwaji wa Wananchi kutoka Mradi wa Uimarishaji Mifumo katika Sekta za Umma Dokta Nazar Sola amesema kuwa mafunzo hayo yatasaidia  kuwajengea uwezo wawezeshaji  ngazi za Kata  waweze kwenda kuhamasisha Wananchi kuibua Miradi itakayokidhi matarajio yao na kujiletea maendeleo huku wakipata ufahamu wa majukumu yao katika kujiletea maendeleo.