MAARIFA NA JUHUDI VITAONGEZA UZALISHAJI- NAIBU WAZIRI KILIMO

Posted on: October 25th, 2018

Naibu Waziri wa Kilimo Mhe. Omari Mgumba amewakumbusha wananchi wote nchini  kuwa kilimo ndio uti wa mgongo wa nchi yetu kwani kupitia kilimo watu wanapata mahitaji mbalilmbali ikiwemo chakula, kipato katika kaya, kuongeza mapato ya wilaya na kuinua uchumi wa nchi kwa ujumla, hivyo ni vema kila mmoja akathamini kazi za wakulima kwani ndio tegemeo la chakula kwa taifa letu la Tanzania.

Hayo yamesemwa Oktoba 24 mwaka huu na Naibu Waziri wa Kilimo wakati wa uzinduzi wa msimu wa kilimo 2018/2019 wilayani Kilosa na kuhamasisha wadau wote katika sekta ya kilimo kufanya kazi kwa juhudi kubwa na maarifa katika kuongeza uzalishaji  na tija kupitia mnyororo wa thamani kwa kila zao na kuinua kiwango cha ushirikiano kwa hali na mali ili kuinua sekta ya kilimo itakayowezesha  wananchi walio wengi kupata kipato na kutoa mchango kwa taifa kuelekea uchumi wa kati ifikapo 2025.

‘‘Serikali ya awamu ya tano imedhamiria kwa dhati kuboresha sekta ya kilimo na miundombinu  ya barabara na reli ya kisasa ambavyo vitasaidia usafirishaji wa mazao na bidhaa hivyo ni rai yangu  kwenu kuchangamkia fursa hii kwa kuzalisha  mazao ya kilimo kwa wingi pamoja na uwekezaji katika viwanda vya kuchakata mazao ili kuongeza thamani’’. Ameongeza Mgumba

Kaulimbiu ya msimu huu ni kanuni bora za kilimo ndio mkombozi wa mkulima tuzifuate, kwa kaulimbiu hii ni matarajio yangu mtautambua mpango mkakati wa kilimo wa wilaya kasha mtautekeleza kwa kuufanyia kazi ili kuboresha kipato cha kaya, jamii na taifa kwa ujumla kwani wilaya hii ina rasilimali nyingi sana ambazo zikitumika ipasavyo zitaleta maendeleo makubwa katika wilaya na kuondoa hali ya maisha duni kwa wananchi hususan wakulima wadogo.

Aidha Mgumba ametoa wito kwa wakulima kujituma, kubadilika, kujibidiisha, kupokea na kutumia mbinu bora za kilimo na teknolojia zinazotolewa  na wataalam kwani miongoni mwa changamoto zinazowakabili wakulima ni kutozingatia kanuni bora za kilimo pamoja na  hivyo wakulima hao wanapaswa kuzingatia kilimo bora kutambua na kuthamini mchango mkubwa wa wadau wa kilimo kwa kutekeleza kwa vitendo teknolojia zote zinazofundishwa na wadau ili kuzalisha malighafi zitakazotumika na viwanda  vilivyopo na vitakavyoongezeka.

Aidha niwajuze kuwa ili muweze kunufaika na uwezeshaji wa kupata mitaji ambayo ndiyo changamoto kubwa mnatakiwa  kujiunga na kuimarisha vikundi na vyama vya ushirika vikiwemo vikundi vya uzalishaji, vyama vya ushirika vya mazao, na vyama vya ushirika vya kuweka na kukopa ambavyo vinaweza kuwa mkombozi kwenu kwa katoa mitaji na elimu ya ujasiriamali ambayo itasaidia kuongeza kipato na kujikomboa kiuchumi.

Sambamba na hayo amewapongeza viongozi wa wilaya katika kupunguza migogoro ya wakulima na wafugaji na kusma kuwa migogoro hiyo kwa kiasi kukibwa inapunguza uzalishaji mazao na uchumi hivto ameusisitiza uongozi kushirikiana na kamati za amani ngazi zote kuhakikisha ufumbuzi wa kudumu unakuwepo baina ya wakulima na wafigaji ili kila mmoja ashiriki kikamilifu kwenye uzalishaji.