MAMA SAMIA AWATAKA WAWEKEZAJI KUWEKEZA MJI WA MIKUMI

Posted on: August 4th, 2024

Rais wa Jamuhuri ya Muungano wa Tanzania Mhe Dkt. Samia Suluhu Hassan amewataka wawekezaji kuwekeza katika kujenga Hoteli za kisasa kwa wingi zitakazotumiwa na wageni pamoja na watalii watakaojitokeza nje na ndani ya nchi kufanya utalii katika Hifadhi ya Taifa ya Mikumi.

Mhe.Rais ameyasema hayo 4 Agosti, 2024 wakati akizungumza  na wananchi wa Mji wa Mikumi ikiwa ni mwendelezo wa ziara yake Wilayani Kilosa na kuongeza kuwa kupitia  Filamu ya Royal Tour na uwepo wa Reli ya kisasa (SGR) imeongeza  watalii  wengi  katika Hifadhi yaTaifa ya  Mikumi kutoka wageni  54,021 mwaka 2019/2020 hadi kufikia  wageni 138,844 mwaka 2023/2024.

Aidha Rais Samia amesema kuwa Filamu hiyo ya Utalii imekuza utalii nchini na kwa sasa serikali inawekeza kwenye miundombinu ili kurahisisha usafiri na usafirishaji wa watalii na kuwasisitizia wawekezaji kujenga hoteli za kisasa zitakazoweza kukidhi mahitaji ya watalii.

Kwa upande mwingine  amesema kuwa Serikali  ina lengo la kuunganisha  reli iliyopo, reli yaTazara na reli ya SGR  ili kurahisisha shughuli za usafiri  na usafirishaji wa bidhaa na watu ili kuleta maendeleo nchini.