MHE. SHAKA AWATAKA VIONGOZI NGAZI YA VIJIJI NA KATA KUZUIA KUINGIZA MIFUGO KIHOLELA

Posted on: July 16th, 2025

Viongozi ngazi ya Vitongoji, Vijiji na Kata wametakiwa kuacha utaratibu  wa kuingiza mifugo kiholela katika maeneo yao kutoka miji ya jirani hususani maeneo ya mipakani  kwani kufanya  hivyo ni kinyume na utaratibu na atakayebainika atachukuliwa hatua kali za kinidhamu.

Hayo yameelezwa Julai 16, 2025 na Mkuu wa Wilaya ya Kilosa Mhe. Shaka Hamdu Shaka wakati akizungumza na wananchi katika Ziara yake kata ya Malolo ambapo amewataka viongozi hao kutimiza uwajibu wao  pasipo kutanguliza maslahii yao binafsi  kwani kufanya hivyo kunasababisha migogoro ya Wakulima na Wafugaji wilayani hapa.

Mhe. Shaka amesema kuwa viongozi wamepewa dhamana ya kulinda na kutetea maslahi ya wananchi na sio kuwakandamiza kwa kutumia vibaya mamalaka waliyopewa kwa manufaa yao binafsi na kwamba hali hiyo inasababisha  uvunjifu wa Amani katika maeneo yao

“Ni marufuku kuingiza mifugo kwenye kata hii na wilaya hii kinyume na utaratibu tukikubaini hatua kali za kinidhamu tutazichukua” . Alisisitiza Mhe. Shaka

Mkuu huyo wa Wilaya ameongeza kwa kusema kuwa  asilimia 80 ya shughuli zinazofanyika katika kata hiyo ni kilimo hivyo amewataka Viongozi hao kujikita zaidi katika kusimamia shughuli za kiuchumi zitakazoleta maendeleo kwa Wananchi wa kata hiyo na Wilaya nzima kwa ujumla.

“Mkipata ushauri mzuri wa kitaalamu wa kilimo Malolo mnauwezo wa kufungua fursa za wafanyabiashara wakubwa ndani na nje ya nchi  kuja kuchukua bidhaa katika kata hii”. Alisema Mhe. Shaka

Katika Ziara hiyo Mhe. Shaka amembelea na kukagua Miradi ya maendeleo ikiwemo Mradi wa usambazaji wa maji safi na salama, Ujenzi wa barabara kiwango cha kokoto kitongoji cha Ruaha darajani,Shule ya msingi Chabi na kituo cha afya Malolo.