Michezo ni ajira - DC Kilosa

Posted on: May 24th, 2018

Mkuu wa Wilaya ya Kilosa Adam Mgoyi Mei 24, 2018  amewahimiza wanamichezo wote wanaoshiriki katika mashindano ya UMISSETA ngazi ya Halmashauri kutambua kuwa michezo ni sehemu ya kufanya maandalizi na kujionyesha  kwa ajili ya ajira kwani wachezaji wakubwa nchini kama kina Thomas Ulimwengu wanapata pesa nyingi kupitia mpira wa miguu jambo linalothibitisha kuwa michezo ni ajira.

Mgoi ambaye alikuwa mgeni rasmi katika ufunguzi wa mashindano hayo ngazi ya Halmashauri yenye kauli mbiu ’’Michezo Sanaa na Taaluma ni msingi wa wanafunzi katika maendeleo ya Taifa letu’’ amewataka wanamichezo waliochaguliwa kuunda timu ya wilaya na kuwakilisha vyema katika mashindano, hivyo wanapaswa kujituma, kujenga moyo wa ushindani na kuweka nidhamu mbele.

Aidha ametoa rai kwa walimu kuwa kioo cha jamii pamoja na  kutumia sheria na taratibu za kazi kwa maslahi ya taifa  jambo litakalosaidia kutokuwa chanzo cha kuwakatisha masomo wanafunzi kwa sababu zozote zile bali kusambaza ujumbe wa malezi bora kwa wanafunzi wote.

Akisoma risala kwa mgeni rasmi Mkuu wa Idara ya Elimu Sekondari Paula Nkane amesema mashindano hayo ya siku nne yanayofanyika katika viwanja vya Shule Sekondari Mazinyungu yanashirikisha clasta za Kilosa, Kimamba. Mikumi, Zombo na Dumila ambapo zitacheza michezo  mbalimbali ikiwemo riadha, mpira wa wavu, mpira wa kikapu, soka, netbali na fani za ndani na kupitia michezo hiyo wanafunzi wataweza kuongeza uelewa darasani na kuongeza taaluma kwani michezo huimarisha afya ya akili na mwili.