RAIS SAMIA AWATAKA TANROADS KUWAPA KIPAUMBELE WAKANDARASI WAZAWA

Posted on: August 3rd, 2024

Rais wa Jamhuri ya Muungano wa Tanzania Mhe. Dkt. Samia Suluhu Hassan amewataka Wakala wa Barabara Nchini (TANROADS) kuwapa kipaumbele wakandarasi wazawa ili kuwajengea uwezo na kukuza uchumi wao na nchi kwa ujumla.

Mhe Rais  ametoa kauli hiyo  3 Agosti,2024 katika uwanja wa Shule ya Msingi Kilosa Town  wakati akizungumza na Wananchi baada ya kuzindua barabara ya Rudewa -Kilosa yenye urefu wa km 24 ambayo ujenzi wake umeghalimu kiasi cha shilingi Bilioni 45.6.

Mhe. Samia amesema kuwa  endapo mkandarasi mzawa  atapewa kazi na kupata malipo ya kazi hiyo atatumia fedha hizo kununulia bidhaa na kulipa posho za vibarua lakini pia  atazitumia fedha hizo  katika matumizi mbalimbali ya kawaida na kupelekea fedha hizo kuzunguka ndani ya nchi.

Aidha Rais Samia ameongeza kuwa Mradi huo wa barabara utarahisisha shughuli za usafiri na usafirishaji kwa wananchi  na bidhaa zao  hivyo,  kushamiri kwa biashara na kupandisha uchumi wa Kilosa.

Katika hatua nyingine,  Mhe. Rais ameipongeza TANROADS na wakandarasi wazawa kwa kukamilisha mradi huo wa barabara ambao utaleta tija kwa wananchi na kuwataka wananchi  kuitunza miundombinu yote iliyotekelezwa wilayani hapo.