RC MALIMA AMEWATAKA WAFANYAKAZI KUFANYA KAZI KWA JUHUDI ILI KULETA TIJA MAHALA PA KAZI NA TAIFA KWA UJUMLA

Posted on: May 1st, 2024

Mkuu wa Mkoa wa Morogoro Mhe. Adamu Kighoma Malima amewataka wafanyakazi  kufanya kazi kwa juhudi na  maarifa huku wazithamini na kuzi heshimu kazi zao ikiwa ni pamoja na kuacha vitendo  visivyo vya kinidhamu kazini kama vile wizi na uvivu.

Ametoa kauli hiyo wakati akihutubia Wafanyakazi na Wananchi kwa ujumla katika  Maadhimisho ya siku wa Wafanyakazi Duniani Mei Mosi, 2024 ambayo Kimkoa yamefanyika mjini Ifakara  ambapo pamoja na mambo mengine amesema kila Mfanyakazi anapaswa kuwa mwangalizi na mshauri wa mwenzake ili kuleta tija katika kituo cha kazi na Taifa kwa ujumla.

 Akijibu Hoja zilizosomwa kwenye Risala ya Wafanyakazi amesema kuwa Serikali ya awamu ya sita imekuwa ikifanya Jitihada mbalimbali za kuboresha Sekta ya ajira ikiwa ni pamoja na kuajiri watumishi wapya,kupandisha vyeo,lakini pia kuanzisha Mahakama Kuu kanda ya Morogoro ili kusikiliza na kutatua mashauri na kesi mbalimbali kuhusiana na ajira na Watumishi ndani ya Mkoa wa Morogoro.

Mhe. Malima pia amemwagiza Kamishna wa Kazi Mkoa wa Morogoro kupita mara kwa mara kwenye maeneo ya kazi ili aweze kujua changamoto zinazowakabili  wafanyakazi lakini pia kumaliza migogoro ihusuyo Mikataba ya ajira.

Katika hatua nyingine Mkuu huyo wa Mkoa amewapongeza Wafanyakazi waliotunukiwa vyeti vya utumishi Hodari na kuwataka kujituma zaidi ili kutoa hamasa kwa wenzao.

Akitoa salamu za Mei Mosi, Mwenyekiti wa Shirikisho la Vyama vya Wafanyakazi (TUCTA)Mkoa  wa  Morogoro  Jumanne Nyakirang’ani amemshukuru Mkuu wa Mkoa wa Morogoro kwa kukubali  kuwa mgeni rasmi katika sherehe hizo,Aidha amewashukuru waajiri wote ndani ya Mkoa  kwa kuendelea kushirikiana vyema katika kutatua changamoto za wafanyakazi.

Akisoma Risala kwa Mgeni rasmi Nicolaus Ngowi ambaye ni Mratibu wa TUCTA Mkoa wa Morogoro amezitaja hoja  ikiwa ni pamoja na kuitaka Serikali kupunguza kodi kwa Waajiri hususani sekta binafsi, kufanyika upya kwa majadiliano juu ya kikokotoo, kadhalika Bima za Afya kwa Wastaafu na uwepo wa Mikataba rasmi kwa Wafanyakazi wa Sekta binafsi pamoja na kuchelewa kwa suluhu juu ya Migogoro ya Wafanyakazi.