TIMU YA UKAGUZI TAMISEMI YATEMBELEA MIRADI YA MAENDELEO YENYE THAMANI YA SHILINGI BILIONI 5.3

Posted on: July 15th, 2025

Timu ya Wataamu kutoka Ofisi ya Rais TAMISEMI na Mkoa imefanya ziara ya kutembelea na kukagua Miradi ya Maendeleo yenye thamani zaidi ya shilingi Bilioni 5.3 inayotekelezwa Wilayani Kilosa.

Ziara hiyo imefanyika Julai 15, 2025 ikiongozwa Afisa Mipango Mkuu kitengo cha ufuatiliaji na Tathmini TAMISEMI Ndg. Henry R. Mutungo ambapo amesema  ziara hiyo imelenga kufanya ufatiliaji wa Miradi ya Elimu Msingi, Sekondari na Majengo ya Utawala kisha  kufanya tathimni ya utekelezaji.

Akizungumza wakati wa ziara hiyo Mutungo  amewataka wahandisi wanaosimamia miradi kuhakikisha wanafanya tathmini ya mradi kwa usahihi kulingana na maeneo husika ili kupata kiwango cha bajeti cha uwakika kitakachoweza kukamilisha miradi.

“Wahandisi fanyeni tathimini ya majengo kwa uwakika kulingana na eneo ambao  mradi unatekelezwa  ili kupata bajeti itayoweza kukamilisha mradi”. Alisema Mutungo

Aidha, ameongeza kuwa wasimamizi wa Miradi hiyo kuongeza juhudi ya usimamizi kwa kutoa ushirikiano na kufatialia kwa kila hatua ya ujenzi ili kuepuka changamoto zinazorekebishika wakati wa utekelezaji wa mradi.

Pia timu hiyo imeshauri kitengo cha Usimamizi wa Manunuzi na Ugavi kuendelea kutoa elimu ya matumizi ya mfumo wa Nest kwa mafundi ili waweze kupata uelewa wa kuomba zabuni ili kutatua changamoto ya uchache wa mafundi wanaoomba zabuni hizo hali inayopelekea miradi kutokamilika kwa wakati.

Naye Katibu Tawala Msaidizi sehemu ya Mipango na Uratibu Mkoa Bi. Edina Katalaiya  ameutaka uongozi wa shule kutoa elimu kwa wanafunzi juu ya utunzaji wa miundombinu  ili miradi iweze kutumika kwa muda mrefu huku akisisitiza suala la utunzaji wa mazingira.

Kwa upande wake Mkurugenzi Mtendaji wa Halmashauri ya Wilaya ya Kilosa Bi. Beatrice Mwinuka amesema amepokea maoni na ushauri mbalimbali yaliyotolewa na timu hiyo juu ya ukamilishaji wa miradi hiyo na kuahidi kuzifanyia kazi.

Katika ziara hiyo miradi iliyotembelewa ni Pamoja na Jengo la Utawala , Nyumba ya Mkuu wa idara, Shule ya Msingi Matongolo, shule ya Sekondari  Amali, Dumila na  Chanzuru.