UJENZI WA RELI KUNUFAISHA WANANCHI

Posted on: April 25th, 2018

Mkuu wa wilaya ya Kilosa Adam Mgoyi amewataka wadau mbalimbali wa maendeleo kuchangamkia fursa mbalimbali ikiwemo fursa za ajira, kimaendeleo na kibiashara zitakazojitokeza kupitia ujio wa mradi wa reli ya kati na reli ya mwendo kasi (standard gauge)  kwa kujiletea maendeleo ya mtu mmoja mmoja na wilaya kiujumla.

Mgoi amesema kuwa ujio wa miradi hiyo miwili ni lulu kwani itatoa mwanya mkubwa wa maendeleo kwani kupitia reli hizo kutakuwa fursa kubwa za kutanuka kiuchumi ambapo wananchi watapata ajira, uchumi utapanda viwango na pia wawekezaji watawekeza katika maeneo mbalimbali yaliyopo wilayani Kilosa.

Akieleza kuhusu miradi hiyo Injinia  Mlemba Singo ambaye ni Mratibu wa Mradi wa Uboreshaji wa Reli ya Kati  amesema mradi huo unalenga kukarabati reli iliyopo kwa kipande cha Dare s salaam – Isaka kwa Kilomita 970 ili kuinua uwezo wa kubeba mizigo toka tani 13.5 hadi tani 18.5 huku ujenzi wa reli ya kisasa amesema ni reli ya kisasa itakayokuwa na uwezo wa kupitisha treni zitakazoendeshwa kwa nguvu ya umeme yenye mwendo kasi usiopungua kilomita 160 kwa saa.

Singo amesema miradi hiyo italeta tija kwa wananchi kwani kutakuwa na ongezeko la usafirishaji  wa mizigo ambapo reli itabeba mizigo mpaka tani 10000 kwa mkupuo, uokoaji  wa muda wa kusafiri kwa abiria na mizigo, ongezeko la ajira , uboreshaji huduma za kijamii, kuchochea maendeleo katika sekta ya kilimo,  na faida za kiuchumi kwenye sekta ya usafirishaji hasa kupunguza gharama za mara kwa mara za matengenezo ya barabara.