VIJANA 22 WILAYANI KILOSA WANUFAIKA NA MRADI WA SUMUKUVU

Posted on: August 14th, 2023

Vijana 22 kutoka maeneo mbalimbali Wilayani Kilosa wamekabidhiwa vifaa chuma vyenye thamani ya shilingi milioni moja na nusu kwa kila mmoja bure na Wizara ya kilimo kwa kushirikiana na VETA kupitia Mradi wa SUMUKUVU kwaajili ya kutengenezea vihenge vya kuhifadhia nafaka lengo likiwa ni kumsaidia  Mkulima kupata nyenzo sahihi ya kuhifadhia nafaka mara baada ya mavuno,na pia kujiajiri wao wenyewe

Hayo yameelezwa na Mhandisi Jeseph Kivako ambaye ni Afisa Ufuatiliaji na Tathmini ya mafunzo,  na pia Mratibu wa Sumukuvu VETA katika kikao cha kukabidhi vifaa hivyo  Agosti 11 ,2023 ambapo amesema kuwa VETA imeingia makubaliano na Wizara ya Kilimo kwa lengo la kushirikiana kufundisha vijana kuondoa athari za Sumukuvu kwenye mazao ya nafaka hususan Mahindi na Karanga.

Mhandisi Kivako amesema kuwa Sumukuvu inapatikana kabla na baada ya kuvuna huku kukiwa  vipengele viwili vikubwa ambavyo ni  uhifadhi na ukaushaji wa mazao ambapo amefafanua kuwa Mradi huo umejikita katika uhifadhi wa  nafaka hivyo  Wizara ya Kilimo kupitia mradi wa Tanpack pamoja na kujenga Maghala makubwa pia wameona  umuhimu wa wakulima wa kawaida kupata nyenzo sahihi ya kuhifadhia nafaka ambayo ni vihenge vya chuma.

Kivako amesema kwa kuzingatia hilo VETA imetoa mafunzo kwa vijana 420 kutoka Tanzania bara na visiwani na kuwatunukiwa Vyeti ambapo kati yao vijana 22 wametoka Wilayani Kilosa na kwamba mafunzo hayo yatawasaidia kutambulika,pia yatawawezesha  kuwasaidia wakulima kwa kuwaelimisha juu ya faida ya uhifadhi nafaka kapitia  Vehenge vya chuma,na ni matumaini yao kuwa kundi hilo litaenda kutengeneza fursa za ajira katika maeneo yao kupitia vifaa hivyo walivyopewa.

Akizungumza wakati wa kukabidhi vifaa hivyo Mkurugenzi wa Halmashauri ya Wilaya ya Kilosa Kisena Mabuba amesema kuwa Teknolojia hiyo ya uhifadhi wa nafaka kwa kutumia Vihenge hivyo itatoa suluhu ya tatizo la Sumukuvu katika mazao,hivyo  amewataka vijana hao kufanya kazi kwa bidii na pia kutumia vifaa hivyo kwa malengo yaliyokusudiwa na pia waweze kutoa ujuzi huo kwa vijana wengine katika maeneo yao