WAFUGAJI WATAKIWA KUFANYA UFUGAJI WA KIBIASHARA

Posted on: July 5th, 2023

Waziri wa Mifugo na Uvuvi Mhe. Abdallah  Ulega amewataka Wafugaji nchini kuingia kwenye mfumo wa ufugaji wa kisasa na  wa kibiashara ili kuleta tija na kuondoa adha ya migogoro kati ya wafugaji na wakulima  ambayo inaonekana kuwa ni tatizo la kudumu wilayani kilosa na sehemu nyingine zenye idadi kubwa ya wafugaji.

Mhe. Ulega ametoa agizo hilo Julai 4, 2023 katika ziara yake ya kutembelea shughuli za kimaendeleo  katika ranchi ya Mkata ambapo amesema kuwa Serikali imekuja na mpango wa kuandaa program maalum ya kutoa vitalu kwa wafugaji ambapo mfugaji atakodishwa eneo maalum lenye miundombinu kwa ajili ya malisho ya mifugo kwa muda maalum kisha mifugo iyo itaingia sokoni kwa ajili ya biashara kwa kufanya hivyo kutasaidia kutanua soko la mazao ya mifugo nje ya nchi, kupata mitaji kwa maana ya kukopesheka na taasisi za fedha na kuondoa  migogoro ya wafugaji na wakulima.

Sambamba na hayo Mhe. Ulega  amesema kuwa serikali imelenga kutoa elimu ya shughuli za kimaendeleo katika sekta ya ufugaji  kwa vijana hususan wazawa  ambao baada ya mafunzo hayo watakuwa mabalozi wazuri wa kusambaza elimu hiyo katika ngazi ya familia na jamii nzima kwa ujumla na kuleta mabadiliko chanya.

Pia Mhe. Ulega amesema kuwa mara baada ya vitalu hivyo kukamilika ni  marufuku wafugaji kuvamia  maeneo ya vitalu vitakavyotolewa na serikali  na kusisitiza kuwa sheria kali zitachukuliwa kwa yeyote atakaye kiuka agizo  hilo .

Kwa upande wake Mkuu wa Mkoa wa Morogoro Adam Malima amesema lengo lao ni kuwafanya wafugaji wa Mkoa wa Morogoro wafanye ufugaji wa kisasa na wa kibiashara na kwamba ana amini kuwa kwa kufanya hivyo migogoro ya wakulima na wafugaji itakuwa historia Mkoani hapa.