WAKINAMAMA WAKUMBUSHWA KUZINGATIA UMUHIMU WA UNYONYESHAJI KWA WAKATI

Posted on: August 15th, 2023

Afisa Tawala Wilayani Kilosa Bi Anjalla Mono amewataka wakina mama  kuhakikisha wananyonyesha  watoto wao ipasavyo ili kuwakinga na magonjwa mbalimbali kwani maziwa ya mama yana virutubisho sahihi kwa Mtoto.

Rai hiyo imetolewa Agosti 11,2023 wakati wa kilele cha siku ya unyonyeshaji yaliyofanyika  katika viwanja vya kliniki ambapo amesema kuwa virutubisho vinavyopatikana katika maziwa ya mama  vinasaidia katika ukuaji wa mtoto kiakili na pia humjenga mtoto inavyostahiki.

Kwa upande wake Afisa Lishe Wilaya Bi Zaina Kibona amesema kuwa wiki ya unyonyeshaji hufanyika kila mwaka kwa lengo la kuongeza uelewa na kuelimisha juu ya umuhimu wa kunyonyesha maziwa ya mama kwa mtoto kwa kipindi stahiki.

Pia amewataka kina mama kunyonyesha kina kwa kufuata taratibu za unyonyeshaji kama wanavyoelekezwa na wataalamu wa afya ya Mama na Mtoto na kuhakikisha mama anapata mlo kamili ili aweze kuzalisha maziwa kwa Wingi.

Kwa upande wake Mratibu wa chanjo Wilaya Bi Rakhia Ngayungwa amewataka kinamama hao kuzingatia utaratibu na upatikanaji wa chanjo kwa Watoto na kuhakikisha wanapata chanjo zote kama taratibu zinavyoelekeza ili kuwawezesha watoto kukua vizuri

 kaulimbiu ya maadhimisho hayo ni “Saidia unyonyeshaji,Wezesha wazazi kulea Watoto na kufanya kazi zao kila siku’’