WANANCHI WA KATA YA MTUMBATU WATAKIWA KUSHIRIKI UJENZI WA SHULE

Posted on: May 31st, 2023

Serikali imedhamiria kuondoa adha za sekta ya elimu nchini kwa kuwaletea mradi wa Boost ambao umeanzishwa kwa makusudio ya uboreshaji wa miundombinu kwa madarasa ya awali na msingi kwa kuweka mpango wa  shule salama     

Akizungumza katika mkutano wa hadhara uliofanyika katika kata ya Mtumbatu Mbunge wa jimbo la Kilosa Prof Palamagamba Kabudi ameishukuru serikali ya awamu ya sita inayoongozwa  na Mhe Rais Dkt  Samia Suluhu Hassan  kwa  kuendelea kuijenga sekta ya  elimu nchini ambayo inakabiliwa na changamoto nyingi ikiwemo upungufu wa vyumba vya madarasa na madawati.

Profesa Kabudi amewataka wananchi hao kuupokea na kutekeleza mradi wa Boost kwa kushiriki ipasavyo katika utoaji wa nguvu kazi kwenye ujenzi wa shule mpya ya msingi ambayo kwa kiasi kikubwa itapunguza kero ya wanafunzi kusomea nje.

Prof Kabudi amesema kuwa kata ya Mtumbatu imekua ya kwanza kupelekewa mradi wa Boost ambao upo mahususi kwa ajili ya kuboresha na kuimarisha elimu ya awali na msingi Tanzania katika Nyanja mbalimbali ikiwemo kuboresha miundombinu ya madarasa na kwamba ili kukamilika inahitaji nguvu kazi za wananchi.

Awali akizungumza Afisa Elimu Msingi Wilaya ya Kilosa Bi Zakia Fandey amesema wananchi wa kata hiyo wanapaswa kujivunia kuwa waanzilishi wa utekelezaji wa mradi huo ambao ukikamilika utaondoa adha ya mrundikano wa wanafunzi katika darasa moja na kwa kuwa mradi huo ni shirikishi wanatakiwa kujumuika kwa pamoja ili kuleta matokeo chanya kwa haraka.

Kwa upande wa mratibu wamradi wa Boost wilayani Kilosa Nelson Kiliba amesema mradi huo umedhamiria uboreshaji wa miundombinu,shule salama,kuwaongezea walimu ujuzi na kwa mwaka huu wa fedha umeanza kutekelezwa na mradi huo kwa awamu ya kwanza unatekelezwa katika Kata ya Mtumbatu kwa kujengwa shule mpya yenye vyumba saba vya madarasa.