WANANCHI WATAKIWA KUFANYA KILIMO BIASHARA ILI KUJIKWAMUA KIUCHUMI

Posted on: August 4th, 2023

Waziri wa Maliasili na Utalii Mhe.Mohamed Omary Mchengerwa ametoa wito kwa Wananchi kujikita zaidi katika shughuli za  kilimo hususan kilimo biashara ili waweze kujikwamua na hali duni ya kiuchumi na kusema kuwa kazi inayofanywa na Serikali katika Sekta ya Kilimo ni kubwa hivyo amewataka kutumia fursa hiyo.

Mh Mchengerwa amesema hayo  4,Agosti 2023 wakati  alipotembelea viwanja vya  Maonesho ya Nanenane Kanda ya Mashariki  Mkoani Morogoro ambapo pamoja na mambo mengine amepongeza juhudi za Serikali inayoongozwa na  Rais Dokta Samia Suluhu Hassan kwa kuongeza  bajeti ya Wizara ya Kilimo kwa kiwango ambacho haijawahi kutokea hapo awali.

Amesema kuwa Tanzania imejaaliwa maeneo makubwa na yenye rutuba kwa wingi hivyo haipaswi wananchi wake kukosa chakula  na kwamba endapo watu wakijikita katika kilimo cha biashara  kila familia itakuwa na uwezo wa kupata mazao ya kutosha kwaajili  ya biashara na  chakula.

Aidha amewataka Wahesimiwa wakuu wa Wilaya kuhamashisha Wananchi katika maeneo yao kulima kwa wingi kwani kilimo kitaifanya Tanzania kuwa nchi tajiri.