WATENDAJI WA KATA 20 WAKABIDHIWA PIKIPIKI

Posted on: August 15th, 2023

Zaidi ya Shilingi milioni sitini na laki saba (60,700,000) zimetumika  kununulia Pikipiki kwa Watendaji wa Kata 20 za Halmashauri ya Wilaya ya Kilosa ili kuongeza kasi ya ukusanyaji wa mapato,usimamizi wa Miradi ya maendeleo,kuongeza uwajibikaji kwa kuzifikia jamii na kutatua migogoro ya Wakulima na Wafugaji kwa wakati.

Akizungumza katika zoezi la kuwakabidhi Pikipiki hizo Watendaji wa Kata 20,Mkuu wa Wilaya ya Kilosa Shaka Hamdu Shaka amesema hataki kusikia visingizio kwa Mtendaji  kushindwa kufika katika Miradi na kusimamia shughuli za maendelea pamoja na kusaidia jamii katika kukabiliana  na changamoto ya migogoro.

Amewataka Watendaji kufikia lengo la kupunguza kwa asilimia 90 migogoro ya Wakulima na Wafugaji ifikapo mwaka 2024,kwa upande mwingine amewataka kuzitunza vyema Pikipiki hizo ili ziweze kudumu kwa muda Mrefu.

Kwa upande wake Mkurugenzi wa Halmashauri ya Wilaya ya Kilosa,amesema  kutokana na umbali wa vitongoji,vijiji na kata za Halmashauri hiyo, Uongozi ulitenga fedha shilingi milioni 60,700,000/= kwaajili ya kununua  Pikipiki hizo kwa lengo la kuboresha utendaji kazi,kurahisisha shughuli za usimamizi, ufuatiliaji na ukaguzi miradi ya maendeleo inayotekelezwa  katika maeneo yao.

Akizungumza kwa Niaba ya Watendaji wenzake mara baada ya kukabidhiwa Pikipiki hizo ,Mtendaji wa Kata ya Mbigiri Niza Mgombele amesema kuwa wanaishukuru Serikali kwa kuona umuhimu wa kuwapatia  usafiri huo kwani  utarahisisha utendaji kazi  na kuleta tija.