WATENDAJI WA KATA WAMETAKIWA KUELIMISHA JAMII UMUHIMU WA LISHE BORA

Posted on: November 21st, 2024

Watendaji wa Kata wametakiwa kutoa elimu kwa wazazi juu ya muhimu wa lishe bora kwa wanafunzi ili waweze kuchangia chakula hasa wakati wa mavuno na kuhakikisha kuwa  wanafunzi wote wanapata chakula bora mashuleni.

Rai hiyo imetolewa 20 Novemba, 2024 na Katibu Tawala Wilaya Bi. Salome Mkinga wakati akiongoza kikao cha tathmini ya utekelezaji wa Mkataba wa Lishe kwa robo ya kwanza kuanzia julai hadi Septemba 2024 ambapo amewataka watendaji  kuelimisha wananchi athari za watoto kukosa lishe bora na kupelekea kushuka kwa ufaulu.

Ameongeza kuwa ili kuendana na Teknolojia ya sasa watoto wanahitaji kuwa na fikra na uwela mzuri hivyo  ili kutokomeza udumavu wa fikra na kuijenga Tanzania yenye viongozi makini  wazazi na walezi wanapaswa kuwapa lishe bora Watoto.

Bi. Salome ameeleza kuwa  ni muhimu viongozi kuanzia ngazi ya wilaya na kata kuwajibika na kusimamia vyema suala la lishe kwa kushirikiana pamoja ili kutatua changamoto zinazojitokeza katika jamii zao lengo likiwa ni kuhakikisha wanafunzi wote wanapata chakula mashuleni.

Kwa upande wake Mkuu wa Divisheni ya Huduma za Afya, Ustawi wa Jamii na Lishe Ndg. Seleman Kasugulu  amesisitiza viongozi kuanzia ngazi ya kata kushirikiana na kuiga mifano kwa kata jirani zinazofanya vizuri katika suala la lishe ili kupata uzoefu na kuleta matokeo chanya.

Pia Kasugulu ametoa wito kwa watendaji wa kata kuendelea kusimamia na kufuata sheria ndogo za kijiji zilizopo kwa sasa zinazohusu suala la lishe ili ziweze kuwajibisha wale watakaoenda kinyume ili kufikia malengo waliyojiwekea.