WATUMISHI WAHIMIZWA KUFUATILIA KWA UKARIBU TAARIFA ZA MICHANGO YAO YA PSSSF

Posted on: May 16th, 2024

Watumishi wa Halmashauri ya Wilaya ya Kilosa wamepatiwa mafunzo juu ya kutumia Mfumo  wa Mfuko wa Pensheni kwa Watumishi wa Umma ,(PSSSF Portal )utakao wawezesha kufuatilia na kukagua kwa ukaribu taarifa za michango  kupitia simu janja ili kama kuna changamoto ziweze kutatuliwa kwa wakati  kipindi ambacho bado wapo kazini.

Hayo yamebainishwa  16 Mei, 2024 na Mkaguzi Mwandamizi kutoka Ofisi ya PSSSF Kanda ya Mashariki  Morogoro Ndg. Edward Clement Kyungu  ambapo amesema kuwa wanachama wengi wa PSSSF wamekuwa wazito kufuatilia suala hilo la msingi jambo linalopelekea kupata usumbufu mkubwa pindi wanapofuatilia mafao mbalimbali hivyo amewataka kuwa na utaratibu wa kuhakiki taarifa zao mbalimbali  ili kuondoa changamoto zinazoweza kujitokeza pindi watakapohitaji huduma.

Kupitia mfumo huo Mtumishi anaweza kuhuisha taarifa zake muhimu kiganjani mwake na kwamba haitomlazimu kwenda moja kwa moja katika ofisi husika hivyo kuokoa muda na gharama zisizo na ulazima.